បើ Pixel 3 & 3 XL មាន​ជម្រើស 3 ពណ៌​នេះ តើ​អ្នក​នឹង​រើស​យក​មួយ​ណា?

នៅសល់តែប៉ុន្មានសប្តាហ៍ទៀតប៉ុណ្ណោះ ក្រុមហ៊ុន Google នឹងធ្វើការប្រកាស ចេញវត្តមាន ស្មាតហ្វូនម៉ូឌែល Pixel 3 និង Pixel 3 XL ជាផ្លូវការហើយ។ ក្នុងនោះ ប្រិយមិត្តអ្នកអានទាំងអស់គ្នា ក៏ប្រហែលជាបានដឹង ពីរចនាបថរូបរាង និងលក្ខណៈសម្បត្តិសំខាន់ៗ មួយចំនួន នៃទូរសព្ទជំនាន់ថ្មីនេះ រួចមកហើយដែរ តាមរយៈការចុះផ្សាយពី ក្រុមការងារ ខេមបូ រីផត របស់យើង។

យ៉ាងណា សម្រាប់នៅក្នុងថ្ងៃនេះ ក្រុមហ៊ុន Google បានធ្វើការបង្ហោះនូវ រូបភាពថ្មីចំនួន 3 សន្លឹក ដោយមានភ្ជាប់ពាក្យ Coming Soon ហើយសម្រាប់ ពាក្យនេះដែរ មានន័យថា ស្មាតហ្វូនខ្សែស្រឡាយ Pixel 3 នឹងមកដល់ ក្នុងពេលឆាប់ៗ ខាងមុខនេះ។ ចំនុចសំខាន់ដែល Google បានបង្កប់នៅក្នុងរូបភាពទាំងនោះ គឺចង់បញ្ជាក់ប្រាប់ អោយអ្នកគាំទ្របានដឹងថា ទូរសព្ទ Pixel ជំនាន់ថ្មីនេះ នឹងមានជម្រើសចំនួន 3 ពណ៌ នៅពេលប្រកាសចេញ។ សម្រាប់ពណ៌ថ្មីៗ របស់ស្មាតហ្វូន Pixel 3 & Pixel 3 XL រួមមានពណ៌ខ្មៅ, ពណ៌ស និងពណ៌ដូចជីអង្កាម ។ សម្រាប់រចនាម៉ូត ខ្នងខាងក្រោយ គឺនៅតែមានខណ្ឌចែកជា 2 ពណ៌ មិនខុសពីម៉ូឌែល Pixel ជំនាន់មុនៗឡើយ។

ជាចុងក្រោយ សូមបញ្ជាក់បន្តិចថា ក្រុមហ៊ុន Google បានកំណត់យកថ្ងៃ ប្រកាសចេញ Pixel ជាផ្លូវការហើយ ដែលវានឹងប្រព្រឹត្តិទៅ នៅថ្ងៃទី 09 ខែតុលា ឆ្នាំ 2018 ក្នុងទីក្រុងញ៉ូវយ៉ក។ ចុះសម្រាប់ពណ៌ទាំង 3 ខាងលើនេះ តើប្រិយមិត្តអ្នកអាន ពេញចិត្តពណ៌មួយ ណាជាងគេ? កុំភ្លេច Comment ប្រាប់មកវិញ ផងណា!